مساء الأنوار
اليوم
هاد الكلاص اللي غنكتب لكم هو من الأشياء اللي كنعتز بيها فالأرشيف ديال
الطبخ ديالي ههههههه , داااائما كنديروا و مللي كيجي شي ضيف و الله شحال من
مرة كيحسابلهم دالزنقة حيث فيه 2 أسرار كيخليوه يجي بحال ديال البواط .
نبداو أولا بالمقادير
غناخدوا ربع لتر ديال الحليب مع la crème Chantilly
و نديروهوم فشي بول باش نطربوهوم
و نطربوهوم مزياااان حتى نحصلوا على خليط عاقد
من بعد ندخلوه للثلاجة و نخليوه يبرد مزيان.
من بعد ناخدوا 3 بيضات و 2 فاني و ربع كاس ديال السكر
نفرقوا الأبيض على الصفر , و نديروا الأصفر فشي اناء
و نزيدوا عليه السكر و الفاني و نطربوهوم مزياااان
نطربوا مزيان حتى يثقال و يتنفخ
و نخليوه على جنب , من بعد ناخذوا ربع لتر ديال الحليب و نديروا يدفا فوق البوطا
من
بعد نزيدوا عليه الخليط ديال أصفر البيض مع التحريك المستمر , و هذا هو
السر الأول لأن كاين شحال من وحدة كتخلي داك البيض اخضر و كيجي زفر مكيطلقش
البنة فالكلاص , مللي يبدا يغلي , نزولوه من الكاسرونة و نديروه فكاسرونة
أخرى حيث مللي كنقلبوه عاد كيتخلط مزيان مكيبقاش الحليب التحت و البيض
الفوق و نبقاو نحركوا حتى تزول منه الرغوة بتااااتا
مللي يبرد شوية حتى هو ندخلوه للثلاجة , و ناخدوا داك أبيض 3 بيضات اللي خلينا و نزيدوا عليه ربع كاس ديال السكر نطربوه مزياااااان حتى هو حتى يطلع و يوقف
من بعد ندخلوه للثلاجة باش يبرد .
من بعد ناخدوا واحد البواط ديال نستلي كبيرة و نكونوا دايرينه كراميل يعني
ديجا طايب فالكوكوط واحد 40 دقيقة , و هذا هو السر الثاني لأن أغلبية وصفات
الكلاص كيكون فيهم نستلي هكاك مركز و محلى فقط , و نزيدوا معاه واحد
اليوغورت حسب الذوق
نطلقوا الكراميل بعدا فشي اناء بوحدو حتى يتطلق واحد الشوية و ما يبقاش مجموع
مللي نطربوه مزيان نزيدوا عليه داك اليوغورت
و نطربوا الكل مزيااان حتى يتطلق الخليط
من
بعد نجيبوا شي بول كبيير و نخلطوا فيه كاع دوك الخلائط ههههههههه : la
crème chantilly + خليط أصفر البيض + أبيض البيض + خليط الكراميل و نحاولوا
نخلطوا بشوية حتى ينسجم كلشي و ردوا البال مع الكراميل حيث كيهبط التحت
من بعد نجيب قدامي النكهات لي بغيت ديل لقريعات راهم معروفين
و نجيب داكشي اللي ندير فوسط لاكلاص , و أنا هادشي اللي عزيز عليا ناكل و نلقى باش نلعب بسناني ههههههههه
بالنسبة ليا هنا خديت شوية داللوز مهرمش و واحد نص شهدية قاصحة مطيباش مزيان قطعتها طراف صغار خديت فغوي كونفي نص بواطة صغيرة
من بعد كنبدا نقسم فالبواطات و ندير النكهات اللي بغيت , أنا بديت بهذا درت فيه روح ديال الخوخ ولحت فيه طراف ديال شهدية
و خلطت مزيان حتى ولى لونه لون الخوخ ودخلته للكونجيلاتور
من بعد خديت خليط آخر و درت فيه روح ديال لوز ولحت فيه لوز مهرمش ودخلتو للكونجلاتور
من بعد خديت خليط آخر درت فيه روح لفريز ودرت فيه شوية ديال الكولورون ولحت فيه لفروي كونفي ودخلتو للكنجلاتور
من بعد خديت خليط آخر درت فيه بقى غير شوية درت فيه شكلاط
و خلطت مزيان و دخلته حتى هو , هنا بامكانكم تديروا الشكلاط مقطع قطع صغيييرة بحال اللي فبسكوي كوكيز حتى هو كيجي زوين فيه لداخل
و صافي يبات ليلة كاملة حتى يجمد و بالصحة و الراحة , أنا هنا ديما كنقدموا
في كؤوسخاصة بالكلاص او مصايبين بالورقة ديال بسطسلة او كؤوس من الشوكولا
وبصحة و راحة
السبت مايو 26, 2012 6:33 pm من طرف om yasser
